Mickey Rooney 93 urterekin hil da, Estatu Batuetako aktore ospetsua. Haur prodijioa izan zen -Shirley Temple bezala-, 2 urte besterik ez zituenean eszenatokian baitzegoen.Lehenik zinema mutuko izarra izan zen eta gero zinema soinudunarena. Lanean aritu zen 2012. urtera arte, horrelako karrera luze batean egon litezkeen gorabeherekin. Zineman eta telebistan, bietan aldi berean aritu zen, betiere arrakasta handiz.
Haren karrera hasierako titulu ahaztezin hauek aipatu behar dira: Uda-gau bateko ametsa, Captains Courageous edo Boys Town. Geroxeago, beste film esanguratsu hauetan nabarmendu zen: Babes in Arms, The Human Comedy, National Velvet, All Ashore, The Bridges at Toko-Ri, Breakfast at Tiffany's,It´s a Mad, Mad, Mad, Mad World eta beste hainbatetan ere.
Zortzi aldiz ezkondu zen -lehenengo emaztea Ava Gardner izan zen- eta 11 seme-alaba izan zituen.2 Oscar sari ere jaso zituen:gazte saria 1938. urtean eta ohorezko saria 1982. urtean. Maiatzaren 12tik 17ra bitartean ekarriko dugu gogora.
